Todos a cuberto, veñen os esloufudis!!

Leo con certo desasosego a noticia na Voz de hoxe referente a que en Torino veñen de aprobar a creación dun Convivium Galaicum dos esloufút. Aínda que a información non é nova e xa falara no seu momento desta posibilidade, a miña desazón non está motivada pola propia creación do tenderete -faltaría máis, que aquí todo o mundo ten dereito a comer amodo, a todaleche ou simplemente a non comer- senón pola calidade e cantidade da información brindada.

Eu, que son un firme crente en que o xornal coruñés non só é o noso referente informativo por antonomasia, senón que deberían ser aspirantes ao Pulitzer ata os seus anuncios breves, non podo menos que rachar as miñas -pobres- vestimentas e emporcarme de cinzas ao observar a pobreza dos contidos desta nova e os artigos ampliatorios que a acompañan (síntoo, seguro que en xerga xornalística teñen un nome, pero eu bastante teño con saber algo do meu). Extraídos todos eles da páxina principal dos esloufút -ou dun resumo de prensa que anda a rular por aí, non o sei, porque todos os artigos que vou lendo sonche cuspidiños, sexa quen sexa o perpetrador- insisten nas barrilas esas da asociación sen ánimo de lucro, as invasións homoxeneizadoras e o insoportábel ritmo de vida actual.

Aínda máis: na edición en papel (na dixital non a dou atopado) fálase da vindeira inclusión no movemento (ademáis do millo corvo e a centola de Lira) do porco celta, facendo referencia ao da montaña lucense, cando entre as miñas informacións do que se trataba era de dar de alta o procedente dunha explotación de Corcubión. Por outra parte, insístese en mencionar entre os promotores do Convivium -ademais do seu presidente, o xornalista e empresario de turismo e hostalería rural Jesús Trillo- a un tal Josep Pamies, horticultor ilerdense afecionado á medicina naturista que non sei que raios ten que ver con este conto, dado que a súa explotación está en Balaguer, como non sexa que asesorara nalgún momento da xénese do tinglado.

Pois nada, que xa sabedes, que o novo convivium está aberto a todos nos -mellor dito, a todos vos, que en principo só poden entrar persoas dotadas de bo gusto, e evidentemente non é o meu caso-, que van levar os produtos a Terra Madre (a gastos pagos, seica) e ao Teatro del Gusto (supoño que queren dicir o Salón do Gusto; será un lapsus calami ou máis ben unha traizón do subconsciente, non o sei) e que, ademais do esloufút temos outros tingladillos para entretérmonos: o eslougüork (traballar amodo, válido obviamente só para profesores universitarios) e nada menos que o eslousex (mimá….. se o chego a saber non publico a serie de Vaite amodo…..).

E o máis terrorífico: na asemblea de decembro en Muxía van propoñer a creación de esloucities, para cidades caracterizadas entre outras cousas por retrasar media hora os reloxos dos concellos. Eu, que son veciño de Oleiros, e coñecendo o percal, témome o pior…….

Agora en serio: Meus señores de La Voz, fagan o favor de ser un pouquiño máis aplicados no traballo. Vale que se lles vexa o plumeiro no do eólico, as fusións de caixas e tal, pero nos artigos do corazón, prensa rosa e sociedade en xeral, fáganme o favor de recorrer a fontes fiábeis, mesmamente as do blogomillo.